Grupos de Traballo

“Todas as cousas son imposibles, mentres o parecen”.

Concepción Arenal

 

 

Os Grupos de Traballo son unha estructura de carácter voluntario que pretenden ser unha ferramenta activa e flexible que permita potenciar o compromiso do Colexio Oficial de Traballo Social de Galicia (COTSG) coa profesión e cos/as profesionais que representa, ao promover o estudo das necesidades deste colectivo en distintos ámbitos de traballo, introducindo novas propostas para a resolución de problemas comúns e favorecendo o desenvolvemento e ampliación de coñecementos en áreas de traballo social e servizos sociais que están menos desenvoltas.

Os grupos de traballo funcionan e se organizan en base ao Regulamento Grupos Traballo  aprobado pola Xunta de Goberno en xuño de 2020 que ten como obxectivo establecer unhas normas e uns criterios comúns para todos eles.

 

Os Grupos de Traballo cos que o COTSG conta na actualidade son os seguintes:

• Traballo social e exercicio libre. Visibilizar novos nichos de mercado e compartir experiencias laborais no exercicio libre do traballo social a coñecer a situación laboral dos/as traballadores/as sociais que exercen por conta propia

 

• Traballo social e SAF – Comisión SAF. Nace coa finalidade de contribuír e compartir as problemáticas máis comúns na xestión e coordinación dos Servizos de Axuda no Fogar tanto públicos como privados, traballar na creación de modelos, protocolos e ferramentas de traballo que contribúan a mellorar a xestión do servizo, realizar propostas ou modificacións para demandar ás administracións a nivel normativo e de inspección, valorar a situación laboral dos/as técnicos/as de xestión do SAF tanto a nivel de ratio como de función e crear un espazo de diálogo e reformulación do SAF de cara ao futuro.

 

• Traballo social e SS.SS. comunitarios. Loita por garantir unha intervención social de calidade e Reivindicar as eivas atopadas no sistema básico de Servizos Sociais (ratios, salarios, convocatorias, excesiva carga burocrática, etc.)

 

• Traballo social sanitario. Defensa da profesión sanitaria e reivindicación de prazas laborais no SERGAS.

 

• Traballo social, familia e infancia. Naceu co obxectivo de definir o papel do traballo social en todo o relacionado coa área de Familia e Infancia, analizar a situación dos servizos de protección á infancia na Comunidade Autónoma de Galicia, explorar os nichos do traballo social nestes eidos e deseñar plans de formación de calidade.

 

• Traballo social en educación. Recupera e visibiliza a figura do/a traballador/a social no sistema educativo.

 

• Traballo social e feminismos. Espazo de loita e debate, onde se potencia o activismo social feminista para sensibilizar, protexer e impulsar os dereitos do colectivo feminino dentro de calquera eido da sociedade.