Colexio Oficial de Traballo Social de Galicia

Segundo a FITS, a disciplina académica do Traballo social promove o cambio e o desenvolvemento social, a cohesión social, o fortalecemento e a liberación das persoas. Os principios de xustiza social, os dereitos humanos, a responsabilidade colectiva e o respecto para a diversidade son fundamentais para a nosa profesión.

Atendendo ao contexto de crise, aos grandes cambios de modelos estruturais e ao vertixinoso avance tecnolóxico, é de rigor resaltar que o Traballo social é unha disciplina que fica sempre ao carón das persoas mais vulnerables acompañándoas nos seus procesos vitais. A nosa profesión está de xeito implacable en primeira liña coas comunidades e familias, na protección a infancia/adolescencia, promovendo a autonomía e o envellecemento activo dentro dun marco de sociedades sostibles, solidarias e de coidados.

Facer fronte ás novas barreiras estruturais que continúan a perpetuar desigualdades, pon en evidencia a necesidade de creación de espazos de discusión e reflexión liderados polo Traballo social, onde as e os profesionais poidan acordar e planificar novas estratexias de acción que mitiguen a pobreza e promovan a inclusión e a cohesión social.

Resulta imprescindible incidir nas políticas públicas e reverter a pirámide de prioridades dos actuais sistemas, situando de novo ás persoas no eixe central dende unha perspectiva humanista, ecoloxista, feminista e de responsabilidade colectiva. Neste senso, dende as estruturas colexiais débese contribuír ao crecemento e ao desenvolvemento profesional ampliando os coñecementos do colectivo e impulsando novas e boas prácticas, defendendo a independencia e velando pola deontoloxía profesional, garantindo así á cidadanía a máxima calidade nas actuacións. Asemade, é fundamental fomentar no colectivo profesional o coidado mutuo con accións que potencien o autocoidado e velen pola saúde da nosa profesión.

Dende a Xunta de Goberno do Colexio Profesional de Traballo Social de Galicia queremos involucrar á toda a profesión e rede colexial na necesidade dunha participación proactiva canalizando as sinerxias de toda a profesión, fomentando as alianzas comúns e utilizar o consenso como método de toma de decisión.

O COTSG conta con mais de 20 anos de historia na comunidade galega, é un logro froito do esforzo individual de moitas/os compañeiras/os apaixonados pola nosa profesión. Desde o inicio, apostaron pola defensa dos intereses das e dos Traballadores sociais, cuestionaron as condicións estruturais que levan á exclusión social e á opresión, e impulsaron iniciativas de cambio que nos situaron como profesionais referentes no ámbito social.

O Traballo social xa vén demostrando ser unha profesión comprometida coa estabilidade social, así como imprescindible e relevante nas vidas das persoas, das comunidades, e por suposto, na persecución dos dereitos humanos e da xustiza económica, ambiental e social.

Miriam Rodríguez Sierra

Presidenta Colexio Oficial de Traballo Social