O pasado 15 de xuño, o Colexio Oficial de Traballo Social de Galicia presentou recursos fronte a varias convocatorias de administracións locais, ao apreciar aspectos nas súas bases que poderían afectar ao acceso en condicións de igualdade aos procesos selectivos, así como á necesaria correspondencia entre os requisitos esixidos e as funcións propias dos postos convocados.
Nos casos dos concellos de Redondela e Santa Comba, o COTSG solicitou a eliminación do requisito de posuír o permiso de conducir B e da obriga de conducir vehículos desa categoría como condición para acceder aos procesos selectivos de Traballo Social. Esta esixencia considérase desproporcionada cando non aparece debidamente xustificada pola natureza esencial do posto, xa que pode limitar o acceso ao emprego público sen cobertura legal suficiente e sen atender a posibles formas alternativas de desprazamento.
Pola súa banda, no Concello de San Cibrao das Viñas, o recurso presentado polo Colexio solicita a modificación das bases para incluír a titulación de Traballo Social entre as que permiten acceder ao posto de Técnica/o de Servizos Sociais. A intervención social, a garantía de acceso aos recursos, a continuidade dos procesos de acompañamento e o coñecemento do Sistema Público de Servizos Sociais forman parte do núcleo competencial da profesión, polo que se entende que a formación específica en Traballo Social resulta plenamente adecuada para o desempeño das funcións previstas.
Así mesmo, no Concello de Arteixo, o COTSG solicitou a revisión das bases reguladoras do proceso selectivo para a dirección do Centro de Información á Muller, ao considerar necesario que a convocatoria respecte o perfil profesional previsto na normativa autonómica e garanta unha adecuada relación entre a formación requirida e as responsabilidades do posto. Os recursos especializados deben contar con perfís coherentes coas funcións de dirección, coordinación, atención, orientación e promoción da igualdade que lles son propias.
Estas actuacións enmárcanse no labor de seguimento que o COTSG realiza sobre aquelas convocatorias públicas que afectan ao exercicio profesional do Traballo Social. Un traballo discreto, técnico e constante, orientado a que os procesos selectivos respecten os principios de igualdade, mérito, capacidade, publicidade e transparencia.
A correcta definición dos requisitos de acceso non é unha cuestión meramente administrativa: repercute na calidade dos servizos públicos, na protección das persoas usuarias e no recoñecemento das competencias profesionais necesarias para unha intervención social responsable.
Desde esta perspectiva, resulta fundamental que as convocatorias públicas se configuren con criterios proporcionados, obxectivos e axustados ás funcións reais dos postos. Só así se garante un acceso xusto ao emprego público e se preserva a calidade técnica dos servizos que se prestan á cidadanía.
Con estas actuacións, o COTSG reafirma o seu compromiso coa defensa da profesión e coa garantía de que o Traballo Social ocupe o lugar que lle corresponde nos espazos profesionais nos que a súa formación, metodoloxía e práctica resultan esenciais.
