O Colexio Oficial de Traballo Social de Galicia (COTSG) estivo presente no III Congreso de Traballo Social Forense, celebrado os días 15 e 16 de outubro de 2026 en Tarragona, baixo o lema “Innovando ante as violencias invisibles”.
O encontro, organizado pola Asociación Española de Trabajo Social Forense, o Consejo General del Trabajo Social e a Universitat Rovira i Virgili, reuniu profesionais de diferentes puntos do Estado para compartir coñecemento, experiencias e novas ferramentas arredor da intervención social no ámbito forense.
En representación do COTSG participaron membros da Xunta de Goberno, xunto cunha persoa colexiada beneficiaria dunha das bolsas concedidas polo Colexio para facilitar a asistencia ao Congreso, reforzando así a presenza galega nun espazo de referencia para o desenvolvemento e a especialización do Traballo Social Forense.
Precisamente, o pasado mes de agosto o COTSG puxo a disposición da colexiación 10 bolsas destinadas a cubrir o custo da matrícula do Congreso, unha iniciativa orientada a facilitar o acceso á formación especializada e favorecer a participación das profesionais galegas en encontros de ámbito estatal.
Un espazo para avanzar no Traballo Social Forense
Ao longo das dúas xornadas abordáronse cuestións de especial actualidade para a práctica profesional, como a violencia vicaria e o dano social, a intervención con vítimas, os delitos contra a liberdade sexual, a xustiza restaurativa, a intelixencia artificial aplicada ao Traballo Social Forense, a ética profesional e os novos instrumentos de valoración pericial.
O Congreso contou ademais con espazos para a presentación de pósteres científicos, investigacións, experiencias profesionais e propostas de intervención, favorecendo o intercambio de coñecemento e o fortalecemento da rede profesional.
Para o COTSG, a participación neste tipo de encontros supón unha oportunidade para seguir ampliando coñecementos, establecer redes con profesionais doutros territorios e trasladar a Galicia novos enfoques e ferramentas de intervención.
A presenza do Colexio neste Congreso encaixa tamén coa aposta por seguir impulsando áreas de especialización profesional e abrir novos espazos de participación e desenvolvemento para a colexiación.
Apoiar a participación tamén é fortalecer a profesión
Desde o COTSG consideramos importante non só estar presentes nos espazos profesionais de ámbito estatal, senón tamén facilitar que a propia colexiación poida acceder a eles.
A convocatoria de bolsas para este Congreso permitiu apoiar a participación de profesionais interesadas no ámbito forense e contribuír a que o coñecemento, as experiencias e os contactos xerados nestes encontros poidan regresar despois á comunidade profesional galega.
Continuamos así traballando para crear oportunidades de formación, participación e especialización, reforzando ao mesmo tempo a presenza e a visibilidade do Traballo Social galego nos principais espazos profesionais.
Máis información sobre o III Congreso de Traballo Social Forense:
III Congreso de Trabajo Social Forense – Asociación Española de Trabajo Social Forense
