- Do mesmo xeito posiciónanse en contra do bono extraordinario á dependencia e da tarxeta moedeiro por entender que son medidas “asistencialistas” que revelan un “modelo de atención obsoleto”
Redacción, 22-06-20.- Tras o anuncio da Xunta de regalar un bono de 250€ ás e aos traballadores sociais que traballaron nos diversos servizos fronte á COVID19, o Colexio Oficial de Traballo Social de Galicia (COTSG), quere anunciar que rexeita dita medida. Desde a Xunta de Goberno sosteñen que “o código deontolóxico e a nosa ética impídennos aceptar esta extraña compensación por facer o noso traballo”. Nesta liña sosteñen que “o que si sería todo un recoñecemento para as e os traballadores sociais é que desde a administración autonómica se cumprisen as ratios de referencia na dotación de persoal para os servizos sociais (comunitarios, sanitarios, etc) para dar cobertura de xeito continuado e garantista aos servizos sociais como esenciais dentro da comunidade”.
Para a Xunta de Goberno, o que precisa o colectivo das e dos traballadores sociais que “traballou durante a crise con capacidade de autoxestión pola falta de protocolos” son “contratos estables e un reforzamento inmediato do sistema para a crise que non fixo máis que comezar”. En poucas palabras, afirman “queremos que a administración galega trate ao noso colectivo con consideración e non con medidas improvisadas e electoralistas”.
Outros bonos
Porén, desde o COTSG non só se centran neste bono. Desde a institución subliñan que o bono de coidado extraordinario á dependencia non “garante a atención integral que se presta nos centros de día que, por certo, seguen pechados malia que poderían estar abertos, segundo o plan de reactivación no ámbito sociosanitario desde o 25 de maio”. Nesta liña consideran que a axuda “non contribúe a acadar a intensidade dos servizos de atención diurna nin a mellorar e manter o mellor nivel posible de autonomía persoal e apoiar ás familias coidadoras”. A Xunta de Goberno afirma que “non responde ás necesidades das máis de 14.000 persoas ususarias de centros de día onde se lles presta atención especializada, co conseguinte risco de que se deteriore a sua saúde, a capacidade cognitiva, a mobilidade e a interrelación social. As persoas usuarias dos mencionados servizos precisan seguridade e estabilidade”.
No caso da tarxeta moedeiro, destinada á adquisición de alimentos en supermercados, que tamén vén de anunciar a Xunta en periodo preelectoral, desde o COTSG entenden que “pon de manifesto un modelo de atención obsoleto, de carácter asistencialista e cercano á beneficencia. Tampouco queremos pasar por alto o carácter estigmatizador que conleva o levar unha tarxeta “de pobre”.
En consecuencia, desde a Xunta de Goberno consideran que a Administración debe apostar por uns servizos públicos que den cobertura con dignidade aos dereitos máis esenciais”.