Compartimos con vos un manifesto que traballadoras sociais da Xunta de Galicia, están facendo circular para recabar apoios. Para asinalo seguide o enlace que aparece ao final.
As persoas abaixo asinantes queremos expresar o noso apoio ao persoal técnico das escalas facultativas de Servizos Sociais da Xunta de Galicia ante a situación que está a atravesar en relación co actual concurso de traslados e coa súa carreira profesional.
Este colectivo, formado por psicólogas e traballadoras sociais, constitúe un dos grupos con maior formación e experiencia acumulada ao longo de anos de traballo directo con colectivos vulnerables. A pesar diso, levan anos vendo limitado o seu dereito á mobilidade, con casos de ata 18 anos sen posibilidade real de traslado debido a erros na xestión da Administración e á retirada de prazas por sentenzas xudiciais.
A situación é especialmente grave en ámbitos como o IMELGA e os xulgados de menores, onde prazas de alta responsabilidade foron adxudicadas sen concurso público. Todo isto repercute nunha sobrecarga estrutural e afecta á calidade da atención prestada á cidadanía.
Peticións
Por todo o exposto, as persoas asinantes solicitamos:
-
A adopción de solucións urxentes, xustas e eficaces por parte da Xunta de Galicia.
-
A duplicación das prazas afectadas como medida de reparación viable xa aplicada noutras ocasións.
-
Un sistema de provisión de postos transparente e equitativo.
-
A defensa duns servizos públicos dignos.
