O Boletín Oficial do Estado publicou o pasado 3 de outubro a Lei 4/2026, do 1 de outubro, pola que se modifican o Texto Refundido da Lei xeral de dereitos das persoas con discapacidade e da súa inclusión social e a Lei 39/2006, do 14 de decembro, de promoción da autonomía persoal e atención ás persoas en situación de dependencia.
A reforma adapta estas normas ao artigo 49 da Constitución Española e reforza os dereitos das persoas con discapacidade á inclusión social, á autonomía persoal, á vida independente e á accesibilidade universal.
Principais novidades:
Entre os cambios introducidos pola nova lei destacan:
- O recoñecemento da teleasistencia como dereito subxectivo para todas as persoas en situación de dependencia.
- A ampliación e flexibilización da asistencia persoal, que deixa de estar vinculada exclusivamente aos ámbitos educativo e laboral.
- A incorporación da asistencia persoal ao catálogo de servizos, permitindo a súa prestación mediante servizos públicos, entidades privadas concertadas ou unha prestación económica.
- A ampliación do Servizo de Axuda no Fogar ao contorno comunitario próximo ao domicilio.
- A posibilidade de organizar o SAF de maneira coordinada e compartida entre pequenos grupos de persoas que residan próximas e o soliciten voluntariamente.
- O impulso dun modelo de atención personalizada, comunitaria e centrada na vontade, nos desexos e nas preferencias de cada persoa.
- O reforzo da accesibilidade universal e da protección dos dereitos das mulleres, da infancia e das persoas con discapacidade.
- A incorporación das perspectivas de xénero e interseccional como principios das políticas de atención á dependencia.
- A orientación dos centros de día cara a un modelo comunitario, centrado nas persoas e baseado en actividades significativas.
A norma aposta por superar unha visión exclusivamente asistencial dos coidados e avanzar cara a un sistema baseado nos dereitos humanos, na vida independente, na participación comunitaria e no respecto á dignidade e á capacidade de decisión das persoas.
Entrada en vigor:
De acordo coa disposición final vixésimo oitava, a Lei 4/2026 entrará en vigor o 23 de outubro de 2026, aos vinte días da súa publicación no BOE.
Máis información:
